除咗揀小學嗰陣受咗洗會高分啲、中小學有可能入咗天主教/基督教學校要祈禱咁，現今世代嘅人或者比較少感受到基督教對我哋有咩影響，甚至乎會問，基督教對呢個世界究竟有啲咩貢獻？
書名簡單直接咁解答咗依個問題，係基督教嘅出現而創造咗我哋而家所理解嘅西方文明世界。
本書係由兩位作者（橋爪大三郎、大澤真幸）以對談嘅形式編輯而成，就好似睇咗一篇好長嘅訪問。作者們本身嘅target係日本人，而神道教係佢哋嘅民族宗教，日本人相信萬物有靈論，因此神道教亦係多神教。
正因為咁所以佢哋好難去理解一神教嘅邏輯同理論。而依本書正好就適合本身對基督教唔係好了解又或者由細到大聽得太多奇怪邏輯，而反感嘅讀者。
如果正式分類，呢本書應該屬於宗教社會學，以研究宗教同社會嘅關聯出發，並唔係要讀者信教。咁樣撇除咗私心之後，唔合理嘅地方就係唔合理，唔需要去勉強解釋。亦都指出有時候大家所了解到嘅，只係以訛傳訛，或者人後來作出嚟嘅故事，例如聖經入邊係冇講過你唔做啲乜就一定會落地獄。
只不過我都上網望咗望其他人寫嘅書評，當中有一篇係由一位基督徒所寫嘅，佢對於依本書就有唔同嘅諗法同意見，大家有興趣嘅可以睇下。
本書分咗三大部份，包括「了解一神教—作為起源嘅猶太教」、「耶穌基督是什麼？」、同埋「西方是如何建立的？」
前言指出，所謂「現代社會」就係西方式嘅社會文化成為全球標準嘅狀態，亦都因為咁，所以要先了解咗何謂「西方」，之後先再了解我哋嘅社會究竟係乜嘢。
西方嘅核心就係基督教。首先要明白一神教包括猶太教、基督教、同伊斯蘭教。本書入面都幾詳細咁講解咗三個宗教嘅誕生歷史同埋點樣互相影響，依度我就約略咁總結一下。
基督教其實就係由猶太教之中產生，佢以否定猶太教嚟肯定基督教嘅存在，兩者之中最大嘅分別就係耶穌基督嘅存在。然後伊斯蘭教係將猶太教同基督教重新詮釋，再納入自己嘅世界之中。依三個宗教所講嘅神其實都係同一個，唔同嘅係「人面對神嘅方法」。
基督教 Christianity 喺羅馬帝國分裂成東西羅馬之後，隨即分裂為東方基督教Eastern Christianity 同 西方基督教 Western Christianity 兩大傳統。
喺東方基督教之下，有東正教（Eastern Orthodoxy）及東方正統教會（Oriental Orthodoxy）兩個傳統。
西方基督教，則有羅馬天主教（Roman Catholicism）和基督新教（Protestantism）兩個傳統。好多時候我哋講緊嘅基督教都係指基督新教，浸信會、聖公會呢啲只係基督新教之下嘅種種派系。
抽咗啲日常生活中大家比較常質疑又有興趣嘅問題，嚟俾大家了解吓本書係點解釋。
宗教同科學係對立，點解會出現信教嘅科學家？
首先科學同宗教並唔係對立，科學原本係為咗揭開神嘅計劃而誕生出來。呢句說話看似有啲荒謬，但歷史就係咁樣。至於點解科學家都可以信教呢？
其實基督教本身就唔認為《聖經》入邊「逐字逐句」都係正確，所以信徒會一齊討論決定應該點樣理解。但係如果你唔認同所謂正統嘅解釋，就好容易會淪為異端。（冇錯，就係咁霸道）
首先多數派嘅人決定「尊重科學，喺唔同科學矛盾嘅範圍內，認同《聖經》係啱嘅」，福音派就認為「尊重《聖經》，喺唔同《聖經》矛盾嘅範圍內，認同科學嘅結論係啱嘅」咁樣佢哋就可以做到冇矛盾咁同時相信宗教同科學。
另外值得一提嘅係，四卷福音書雖然記錄嘅係同一件事，但係會有唔同嘅解釋或者細節。首先四卷福音書入邊馬可、馬太、路加福音都係屬於「對觀福音」，意思就係可以互相比較一齊讀嘅福音書，剩低嘅就係約翰福音。伊斯蘭教入面《古蘭經》係絕對唔會有其他版本，但係四卷福音書全部都被承認為正典，點解呢？因為福音書係為耶穌基督做見證嘅書卷，即係話每個見證者喺解釋同觀點上有差異係冇問題嘅，但《古蘭經》係穆罕默德直接喺阿拉（神）獲得嘅話語。如果要做對比，應該用伊斯蘭教嘅《聖訓》同福音書做對比，然後《古蘭經》同先知書做對比。
最後想講哲學同宗教嘅關係
基督教最初都唔係好思考理性，直至亞里士多德等既希臘哲學經由伊斯蘭世界傳入，基督教嘗試用宗教意義重新解釋理性。Thomas Aquinas喺《神學大全》入面寫過，法中「有神的法，有自然法，有國王的法。」好明顯神嘅法，人係冇可能理解。但係自然法係可憑着人嘅理性發現神之法嘅一部份。所以哲學、自然科學、社會科學都係喺信仰認同理性為正確嘅狀態之下起步，就算你反對基督教，都冇辦法反對佢孕育咗理性主義。
最後最後，基督教同猶太教伊斯蘭教最唔同嘅地方係在於基督教係被世界遺棄嘅。猶太教同伊斯蘭教嘅宗教法，佢哋眼中就係神對世界上人類嘅關照。猶太教同伊斯蘭教嘅思維模式同基督教最大嘅分別就係，如果想做一件新嘅事，佢哋第一樣要諗嘅係聖經/古蘭經入面有冇講過描述過呢？但係基督教就係去諗，呢件事究竟有冇被禁止嘅呢？就係因為基督教比另外兩個宗教有更加大嘅自由度，佢哋一路都喺摸索之中尋找神留低嘅線索，基督教之中又以新教發展得最好。
本書嘅第三部份仲有啲有趣嘅問題，例如講咗基督教同藝術嘅關係，又或者對康德嘅影響，甚至乎馬克思主義同基督教有幾大嘅相似程度等等，不過講得唔係好深入，遲啲有時間嘅話應該都會重溫一次，上網搵吓資料再睇吓有咩得意嘢可以寫。
文：Heiiyiin
圖：Long
-
足跡報社Utfootprint於1982年成立，立足加拿大多倫多，為多倫多大學學生及加拿大華人提供寫作平台40年。其旨在於動盪的時代，打通世界的文化脈絡；用最動人的文字，記載兩城生活的生存軌跡與社會思潮。歡迎任何合作或投稿，請電郵至 general.footprint@gmail.com。
Comments